Добивај вести на Viber
Дури 93% од гласачите на Крим кои излегоа на референдумот денеска се определија за отцепување од Украина и припојување кон соседна Русија, покажаа излезните анкети по гласањето. Излезноста на референдумот до 16 часот била над 70% од вкупниот број од 1,5 милиони избирачи. Конечните резултати од изјаснувањето ќе бидат објавени утре.
Сепак, политичарите на Крим веќе побрзаа и референдумот го оценија како историски ден. „Сите ќе бидат среќни. По ова почнува ново поглавје“, рече прорускиот кримски премиер Сергеј Аксјонов.
На Крим граѓаните се изјаснуваа од утрово, обезбедувани од засилено руско воено присуство на полуостровот. Кримските Татари не излегоа на гласање, а ги немаше ниту низ улиците додека траеше гласањето. Во Севастопол, седиштето на руската поморска флота, пак, во првите 30 минути по отворањето на гласачките места излегле речиси 65% од граѓаните со право на глас.
Киев не ги признава резултатите од референдумот. Привремениот украински претседател Олександер Турчинов го нарече изјаснувањето „псевдо-референдум организиран од марионетската кримска псевдо-влада под контрола на руските трупи“. Според него ваквиот референдум никогаш нема да ја одразува вистинската волја на населението на Крим.
И Европската унија го осуди референдумот, нарекувајќи го „бесправен и противзаконит“. „Референдумот е бесправен и противзаконит и неговиот исход нема да биде признаен“, изјавија во заедничко соопштение претседателот на Европскиот совет Херман Ван Ромпуј и претседателот на Европската комисија Жозе Мануел Баросо, најавувајќи дека од понеделник Унијата ќе одреди нови санкции кон Русија.
В понеделник се очекува амбасадорите на 28-те земји-членки на ЕУ во Брисел да го состават списокот на руски и проруски функционери на кои ќе започне да им се замрзнува имотот и да не им се издаваат визи за Унијата.
Исходот од референдумот на Кримскиот Полуостров нема да го прифатат ниту САД, кои и натаму инсистираат Москва да најде политичко решение за проблемот. Американскиот државен секретар Џон Кери побара од Русија да помогне за уставни измени во Украина кои ќе придонесат за поголемо почитување на правата на малцинствата и да ги повлече воениоте трупи од Крим. Белата куќа, пак, предупреди дека Русија се соочува со санкции и меѓународна изолација која ќе ú наштети на руската економија.