Добивај вести на Viber
Американскиот претседател Барак Обама го претстави предлог-буџетот за 2015 година, во кој се предвидува владина потрошувачка од 3,9 билиони (3.900 милијарди) американски долари.
И покрај огромните средства што ќе и бидат потребни на администрацијата догодина, тој сепак побара намалување на даноците и даночни олеснувања особено за семејствата со мали деца, но и за оние кои немаат деца.
Обама вели дека буџетот е одраз на неговите планови за намалување на јазот меѓу богатите и сиромашните и огромните економски разлики кои постојат во САД. За сметка на намалувањето на одредени даноци, тој предлага да се укинат дел од повратите на данок што ги добиваат најбогатите Американци.
„Нашиот буџет е одраз на избор. Тој е одраз на нашите вредности. Како земја мора да донесеме одлука дали ќе ги штитиме даночните олеснувања за најбогатите Американци или ќе направиме паметни инвестиции, неопходни за да се креираат работни места и раст на нашата економија, за да добие пошироки можности секој Американец“, рече Обама.
Но, овие предлози на американскиот претседател тешко дека ќе најдат поддршка кај републиканците во Конгресот, кои во замена бараат Владата да ги намали трошењата.
Овие спротивставени гледишта се очекува да доминираат на политичката агенда во Вашингтон, особено затоа што во ноември, целиот состав на Претставничкиот дом и 1/3 од Сенатот ќе се пополнуваат со нови избори.