Охриѓанецот Петар дел од научниците кои добија највисоко научно признание во Данска

Добивај вести на Viber

По втор пат Охриѓанецот Петар Поповски (43) се закити со највисокото научно признание во Данска .

Признанието е од областа на науката и високата технологија а го доделува Министерството за високо образование и наука на Кралството Данска.

Синоќа во Глиптотек музејот во Копенхаген се одржа свечената церемонија а престижната награда „EliteForsk“ на годинешните лауреати им ја додели данската принцеза Мари.

„Наградите се признание за оние што се издвојуваат со својот талент, научниците кои поставуваат повисоки стандарди и цели пред себе, водени од амбициите да бидат најдобри во своите области“, изјавил министерот за образование и наука на Данска, Есбен Лунде Ларсен

Петар Поповски е дипломиран електро- инженер, првенец на Електротехничкиот факултет во Скопје во генерацијата 1997. Магистрира во 2000 година на Електро-техничкиот факултет , каде и привремено работи како асистент, во Институтот за телекомуникации.  Во 2001 година заминува за Данска, на докторски студии во Универзитетот во Алборг. Од 2004 работи како доцент на Универзитетот во Алборг. Од 2008 година покрај универзитетската позиција, работи и како експерт за бежична технологија во фирма за високотехнолошки апарати за слушање.

Првата награда за достигнувањата во областа на бежичните технологии ја добил во 2008 година.