ОТРОВНО РАСТЕНИЕ Е ПРИСУТНО ВО ТИКВЕШИЈАТА: Moже да биде фатално за добитокот

Добивај вести на Viber

Екологисти од Неготино почнаа со активности против отровно растение што ги загрозува екосистемот и земјоделството, информираа вчера од Здружението за заштита на животната средина Ековита во изјава за МИА.

„Станува збор за екомисија, мапирање и контрола на ширењето на инвазивното растение Solanum angustifolia. Ова растение што веќе го има во Тиквешијата, претставува сериозна опасност за екосистемот и земјоделството, ги загрозува тревопасните животни и земјоделските ресурси“, вели Кристина Тодорова, долгогодишен еко активист и член на регионалниот еколошки центар, координатор на проектот.

Таа додаде дека е многу важно навреме да се реагира и да се спречи ширењето на ова растение, плевел.

„Брзо се шири поради климатските промени, што создаваат идеални услови за негово растење. Тоа е отровно за добитокот и претставува директна закана за сточарите и нивната егзистенција. Ако не се спречи неговото ширење, може да доведе до трајни еколошки и економски штети“, вели Тодорова.

Таа појасни дека нивната мисија има за цел да го мапира ширењето на растението во регионот, да спроведе активности за ефикасно отстранување на растението, информирање на локалната заедница, сточарите и земјоделците за ризиците што ги носи ова растение.