ПОЕФИКАСНИ ИЛИ САМО АДМИНИСТРАТИВЦИ НА ПРОДОЛЖЕН ВИКЕНД: Во државните канцеларии се слави

Движењето за социјална правда „Обединети работници“ соопшти дека има загриженост поради околностите поврзани со новиот предлог Закон за административни службеници, а во насока на содржината на истиот и тајмингот на неговото пуштање во јавност.

„Ваквите измени ќе придонесат за енормна разлика во статусот на вработените “под државна капа“ и вработените во приватниот сектор, промовирајќи привилегиран статус на државната администрација која што долги години е во заробеништво на владејачките партии. Иако сме согласни дека на сите работници во Македонија треба да им бидат подобрени работните услови, како и нивниот статус при работен однос, сепак останува фактот дека овој закон се поднесува непосредно пред локалните избори, нешто што создава сомнеж дека истиот ќе биде манипулативно користен за добивање на што поголем број на гласови од страна на владејачката гарнитура, велат од Обединети работници.

Професорката Ана Павловска Данева вели дека е симптоматично зошто е избран петок.

„Јас не мислам дека со изборот на петок како ден во кој ќе се работи само четири часа ќе ја зголеми ефикасноста на администрацијата и да се направи, поквалитетна и пофункционална. И не знам зошто е избран петок, веројатно да се направи некој продолжен викенд, вели Павловска Данева.

Фактор вчера ексклузивно објави дека во членот 55 од Законот кој се однесува на работното време стои:

„Полното работно време на административните службеници изнесува 36 часа неделно, односно осум часа дневно од понеделник до четврток и 4 часа дневно во петок, доколку со закон и/или колективен договор поинаку не е утврдено.

(2) За неполно работно време на административните службеници ќе се смета работното време кое е пократко од 36 часа неделно, а ќе се остварува согласно со закон, пишува во законот.

Инаку Законот беше ставен на ЕНЕР на 21 септември годинава и по коментарите треба да оди на усвојување. Во актуелниот закон распоредот на работното време е од понеделник до петок за 40 работни денови. Работно време е од 7:30 или 8:30 часот до 15:30 или 16:30 часот.

Фактор веќе пишуваше дека за реформите во администрацијата се носат два  нови закони - овој за административните службеници и Законот за вработени во јавниот сектор. 

Законите, според објаснувањата треба да ја направат департизирана и деполитизирана јавната администрација, но и да ги избегнат во неа појавите на непотизам, клиентелизам и кронизам. 

 „Овие закони директно влијаат на целосната деполитизација на државната администрација и ги поставуваат темелите на вредностите и меритократијата за да се стигне до работното место или унапредувањето. Ние сме решени да ги завршиме овие реформи“, изјави пред извесно време министерот за информатичко општество и администрација Јетон Шаќири.

А.Т.