ПОЛОВИНА ОД МЕДИЦИНСКИОТ КАДАР НА ДОГОВОР ДОБИВА ТРАЈНА РАБОТА: Таравари ветува решение за долгогодишниот проблем
Објавено во: Македонија 04 Октомври, 2024
Министерството за здравство, предводено од Арбен Таравари,
презема чекори за решавање на долготрајниот проблем со договорците во јавните
здравствени установи. Таравари денеска најави дека, во соработка со
Министерството за финансии, ќе се обидат да вработат најмалку 1.250 здравствени
работници од вкупно 2.500 кои моментално работат на договор. Тој потенцира дека
оваа категорија, претежно составена од медицински сестри, болничари и
хигиеничари, е од критична важност за здравствениот систем, каде што има голем
недостиг.
„Ќе направам се за да обезбедиме трајно решение за барем половина од договорците, но треба да се координираме со Министерството за финансии. Директорите на болниците ќе имаат клучна улога во идентификацијата на оние кои се приоритетни за вработување,“ изјави Таравари на прес конференцијата по повод првите 100 дена од новата Влада.
Оваа иницијатива е дел од пошироките напори за подобрување на условите во здравството, а проблемот со недостигот на среден медицински кадар е присутен во сите јавни здравствени установи низ државата.