Продолжува соработката меѓу Македонската кошаркарска федерација и Туркиш Ерлајнс
Објавено во: Мои пари 02 Јуни, 2016
Македонската кошаркарска федерација ја продолжува соработката со својот потврден партнер, авиокомпанијата Туркиш Ерлајнс. Денеска, претседателот на МКФ, Петар Наумоски и претставникот на Туркиш Ерлајнс Алтај Шабан во име на генералниот директор за Македонија, Илкер Бајдар, го потпишаа новиот едногодишен договор за соработка.
„Соработката со Туркиш Ерлајнс има огромна тежина и значење за нас. Привилегија е кога зад вашиот тим стои успешна и светска компанија и уште ако таа поддршка се одвива во континуитет. Пред нас имаме многу натпревари да одиграме и големи предизвици, затоа довербата што ја добиваме втора година по ред од Туркиш Ерлајнс е дополнителен мотив за успешно претставување на Македонија“, изјави Петар Наумоски, претседателот на Македонската Кошаркарска Федерација.
Македонските кошаркарски репрезентативци и оваа година со авионската компанија Туркиш Ерлајнс ќе летаат кон уште едно учество на Европско првенство како и на други натпревари низ светот каде ќе ја преставуваат Македонија.
МКФ и Туркиш Ерлајнс својата соработка ја започнаа минатата година, а на задоволство на двете страни оваа соработка продолжува и во следите 365 дена.
Компанијата Туркиш Ерлајнс во Македонија е присутна цели 18 години. Повеќе години е меѓу најдобрите авиокомпании во светот и важи за докажан пријател на спортот.