Путин сака да го претвори Крим во коцкарски рај

Добивај вести на Viber

Експерти на руските министерства за економија, финансии и регионален развој добиле задача да изработат план за економски развој на Крим, кој вклучува изградба на казина и хотели што ќе го претворат полуостровот во место за забава слично на американскиот Лас Вегас. На средба со заменик-премиерот на Русија Димитриј Козак, кој е задолжен за Крим, тие биле задолжени до 15 април да ги пресметаат трошоците за еден ваков проект, кој треба да придонесе за подинамичен раст на штотуку припоената област. Крим оваа година секако ќе има фискален дефицит од околу 55 милијарди рубљи (1.5 милијарди американски долари), кои Москва во целост ќе ги покрие. Тоа нема да е преголем проблем со оглед на тоа што Русија само во првите два месеца годинава има буџетски суфицит од 30.5 милијарди рубљи, но ако ситуацијата продолжи Крим би можел да стане товар на рускиот државен буџет, а официјална Москва тоа не сака да го дозволи. Ако на Крим биде отворена област за коцкање, таа ќе биде дел од посебна економска зона, а компаниите кои ќе се наоѓаат на неа ќе имаат посебни даночни олеснувања. Инаку, Русија во 2009. година го забрани коцкањето на територијата на целата федерација, освен во четири области. Рускиот претседател Владимир Путин одби да го претвори Сочи во коцкарски град и одлучи тоа место, неодамнешен домаќин на зимската Олимпијада, да остане семејно одморалиште.