Шилегов ги „регулираше“ гужвите во Град Скопје
Објавено во: Економија 01 Март, 2019
Денес претпладне градоначалникот Петре Шилегов ги менаџираше гужвите што се создадоа во барака 16 во Град Скопје и навалицата на странки кои дојдоа да се пријават за субвенции за инвертер-клима по објавениот повик.
Шилегов на шалтерските служби им рече да работат само со лицата кои се дојдени да поднесат барање за оваа субвенција, бидејќи чекаа стотици на ред
- Чекам уште од пред отворањето на бараката за да бидам меѓу првите. Знаев дека субвенциите се ограничени, а јас сакам да си вратам половина од парите кои ги платив за климатизерот. Не го чекав да биде објавен повикот, бидејќи од претходно ми беше најавено дека на 1 март ќе биде огласот. Единствено како забелешка имам тоа што мораше да се плати по 50 денари за поднесеното барање и тоа што за парите ќе чекаме по претседателските избори, бидејќи до тогаш законски не смее да има исплати на сметка - ни рече еден од барателите во бараката 16.
Субвенцијата предизвика огромен интерес кај граѓаните кои ги загреваат своите домови со печки кои користат огревно дрво, нафта и други скапи и нееколошки енергенси за да ги заменат со далеку поевтините и поеколошките инвертер клима уреди или други современи системи за затоплување, но истата е ограничена засега на само 1.300 домаќинства, односно вкупно 20 милиони денари.
Уредите трошат околу 30% помалку електрична енергија од обичните клима уреди, а повеќе од 50% ги намалуваат трошоците во однос на греењето со огревно дрво.