Сириецот кој изврши напад во Франција, носел крст и молитвеник
Објавено во: Свет 08 Јуни, 2023
Напаѓачот на деца во парк во Франција носел крст и молитвеник.
Сириецот кој со нож нападна деца во парк во францускиот град Анеси, при апсењето изјавил дека е христијанин и дека со себе има крст и молитвеник, пренесоа француските медиуми. Тој изјавил дека е христијанин кога го пополнувал барањето за азил во Шведска.
Еден од најгледаните новински канали во Франција, BFMTV, изјави дека на видеото, кое се појави по нападот, може да се види како Абделсамих Х. ја крева раката во воздух и зема нешто што го носи околу вратот, крст или медалјон, наводно извикувајќи на англиски „Во името на Исус Христос“.
Четири деца и двајца возрасни се тешко повредени. Три од нив се во животна опасност.
Шведскиот дневен весник Афтонбладет пишува дека 31-годишниот Сириец, кој утрово во францускиот град Анеси тешко повреди со нож четири деца и двајца возрасни, живеел во Шведска од 2013 година.
Тој имал дозвола за постојан престој во Шведска врз основа на право на азил. Во меѓувреме неколку пати аплицираше за шведско државјанство, но секој пат беше одбиен. Последното барање го упати минатото лето, но тој случај уште не е решен.
Афтонбладет пишува дека Сириецот „живеел уреден живот“, а единствениот контакт со правосудниот систем бил пред неколку години кога бил казнет поради злоупотреба на социјалните бенефиции и стипендии.
Тој сè уште бил регистриран во мало гратче во западна Шведска, каде што живеел заедно со неговата 26-годишна сопруга и едно дете. Неговата сопруга тврди дека четири месеци не слушнала ништо за него.
Екстремно десничарските партии во Франција повторија пораки против прифаќањето бегалци.