СТОЛTЕНБЕРГ: Украина сè уште може да победи

Добивај вести на Viber

Според генералниот секретар на НАТО Јенс Столтенберг, Украина може да победи во војната против Русија. 

Тој денеска изјави дека „дојде време“ членките на алијансата да преиспитаат некои од ограничувањата за употребата на оружјето што и се доставува на Украина за борба против Русија.

„Сојузниците ја снабдуваат Украина со различни видови оружје и некои воведоа ограничувања за употребата на ова оружје, тоа се национални одлуки. Но, мислам дека, со оглед на начинот на кој се одвива војната, дојде време да се разгледаат тие ограничувања и да се дозволи Украина вистински да се одбрани“, изјави Столтенберг во Прага на состанокот на министрите за надворешни работи на НАТО.

Украина го повика Западот да ги ублажи тие ограничувања, но државите се поделени околу тоа дали да дозволат на Украина да гаѓа цели на руска територија.

Како што рече Столтенберг, Украина сепак може да ја победи Русија, „но само со постојана силна поддршка од сојузниците во НАТО“.

Британија, балтичките земји и Данска тврдат дека тоа е дел од легитимната самоодбрана од инвазија, а други велат дека оружјето може да се користи само во Украина, изразувајќи стравувања дека нападите врз Русија ќе го вовлечат Западот во конфликтот. Белгија неделава соопшти дека авионите Ф-16 што има намера да ги испорача на Украина може да се користат само во нејзините граници.