Три милиони евра за нови работни места на Западен Балкан

Добивај вести на Viber

Европски проект вреден три милиони евра треба да овозможи зголемување на работните места во дел од државите на Западен Балкан, меѓу кои и Македонија, соопштено е на денешната промоција во Брисел.

Станува збор за заеднички проект на Меѓународната организација на трудот (ILO) и на Советот за регионална соработка (RCC), кои треба да создадат „Платформа за економски и социјални прашања“, која ќе се применува во Албанија, БиХ, Косово, Црна Гора, Србија и Македонија.

Главна цел на платформата, финансирана од ЕУ, е да се засили регионалната соработка и институционалните капацитети на националните администрации, на работодавачите и на синдикатите, со цел да се создаде ефективен пазар на труд и да се имплементираат реформи во социјалните политики, соопшти RCC.

Потпишувајќи го договорoт за проектот, Генералниот секретар на RCC, Горан Свилановиќ изјави дека работејќи со заеднички напори, „Советот очекува да придонесе во засилување на капацитетите на јавната администрација за подобрување на мониторингот врз вработувањата, врз човечкиот капитал и социјалните политики“.

Регионалнито директор на ILO за Европа и Централна Азија, Хајнц Колер, изјави дека „со оваа иницијатива ќе се даде дополнителна димензија на постоечката соработка со ЕУ. Со тоа ќе се поттикнат вкрстувањата и мрежите меѓу институциите што управуваат со пазарите на труд на Западен Балкан и институциите на Европската унија“.

Проектот ќе трае 36 месеци, а тимот што ќе го спроведува ќе биде сместен во Сараево.

Советот за регионална соработка е меѓувладино тело на земјите од региониот меѓу кои и Македонија и е еден вид оперативно тело на SEECP, Процесот за соработка во Југоисточна Европа, каде што Македонија е полноправна членка.