Добивај вести на Viber
За цела ланска година и за првите два месеца од годинава, Украина и должи на Русија 1,55 милијарди долари за гас, објави руски „Гаспром“. Од руското Министерство за енергетика велат дека заради ова нема услови на Украина да и се одобрат повластени цени за гасот и во следниот квартал.
Ваквата информација може да претставува сериозен удар врз украинската економија, која се потпира на руските испораки на гас по пониска цена. Енергетската криза само дополнително може да ја влоши економската состојба во земјата, која е на удар на силната политичка криза со која се соочува Украина.
Ситуацијата во Украина од момент во момент дополнително се комплицира. Долниот дом на рускиот Парламент побара од претседателот Владимир Путин „да преземе мерки за стабилизација на состојбата во Украина“. Се уште е неизвесно за какви мерки станува збор, но според информациите на украинските власти, Русија неодамна испратила 6.000 војници на украинска територија.
Повеќе од 10.000 лица протестираа денеска во Доњецк, упориштето на разрешениот украински претседател Виктор Јанукович, извикувајќи „Русија! Русија!“ и наведувајќи дека нема да ги признаат новите власти во Киев.
Украинската гранична полиција објави дека е во состојба на готовност, а нејзините бродови испловуваат од Крим.
На интернет се појавија снимки од руски хеликоптери кои слетуваат на воениот аеродром во Севастопол, каде што е воената база на руската Црноморска флота:
http://www.youtube.com/watch?v=2TVyPiHVZ1A