ВУЧИЌ ЗА РЕЗОЛУЦИЈАТА ЗА СРЕБРЕНИЦА: Некои земји за кои не очекувавме ќе ни „забијат нож во грб“

Добивај вести на Viber

Српскиот претседател Александар Вучиќ денеска најави дека при гласањето на Резолуцијата за геноцидот во Сребреница ќе има „разочарувачки вести“ во однос на позициите на некои држави. 

„Ги добивме податоците, секако дека ќе има разочарувачки вести во однос на ставовите на некои земји за кои не очекувавме „да ни забијат нож во грб“, но очекувавме голем притисок и знаевме дека ќе има промени во ставовите. Цело време молчеа, но застанаа на страната на оние кои се големи и силни“, изјави Вучиќ.

Тој изјави и дека верува дека „многумина кои ќе гласаат за Резолуцијата за геноцидот во Сребреница утре ќе кажат дека таа е за доброто на Србија“.

„Ќе ја повторат празната приказна дека не е колективна вина на српскиот народ“, вели Вучиќ.

Српскиот претседател рече дека ќе има „и такви кои ќе го издржат притисокот“.

Британската министерка за европски прашања Нус Гани денеска во Белград изјави дека геноцидот во Сребреница е правно заснована, а не политичка одлука и дека тоа не е одраз на српскиот народ, туку се однесува на извршените злосторства.

Резолуцијата за прогласување на 11 јули за Меѓународен ден на сеќавање на жртвите од геноцидот во Сребреница и осуда на негирањето на геноцидот и глорификацијата на воените злосторници ќе биде претставена на Генералното собрание на ОН на 23 мај, а беше спонзорирана од триесет земји. 

Масакрот во Сребреница, познат и како геноцидот во Сребреница бил извршен во периодот од 11. до 23 јули 1995. година во текот на војната во БиХ од страна на војската на босанските Срби и се состоел од убиство на над 8.000 босански муслимани, претежно мажи.