Засега тројца „трчаат“ за Претседател на РМ кај ВМРО-ДПМНЕ
Објавено во: Македонија 03 Мај, 2018
На една година до претседателките избори во Македонија во опозициската партија ВМРО-ДПМНЕ веќе кружат првите имиња на кандидати кои би можеле да бидат номинирани во трката и да добијат подршка од десницата. Иванка Василевска, Татјана Каракамишева и Трајко Славески се „најзвучните“ имиња кои кружат неофицијално од доброинформирани извори, засега само на ниво на гласини во таборот на партијата која има најголем број на пратеници во Собранието на РМ. Сите тројца се професори на Универзитетот „Св.Кирил и Методиј“ и сите добија партиски функции оваа година.
Василевска е блиска со еден од лидерите на движењето „За заедничка Македонија“, Борис Дамовски, и член е на Извршниот комитет на ВМРО-ДПМНЕ. Каракамишева, инаку претседател на комисијата за политички систем во партијата, како гласноговорник жестоко ги брани политиките на ВМРО-ДПМНЕ во јавноста. Славески беше носител на изборна листа и министер за финансии во првиот владин состав на ВМРО-ДПМНЕ формиран во 2006, но си поднесе оставка најверојатно поради несогласувања со тогашниот лидер Никола Груевски, а сега се почесто е застапен во дебатите. откако е поставен за потпретседател на ВМРО-ДПМНЕ по изборот на новиот лидер Христијан Мицкоски.
Инаку актуелниот претседател на РМ, Ѓорѓе Иванов, има уште една година од својот втор мандат и повеќе нема право на ре-избор. Уште сега се лицитира и со имиња во СДСМ, но таму гласините „се очекувани“ со имиња како Стево Пендаровски и Радмила Шекеринска. ДУИ пак ќе инсистира на заеднички кандидат-Албанец.
А.К.