ЗЕЛЕНСКИ: Без зелено светло од САД, другите сојузници веројатно нема да дозволат Украина да го користи нивното оружје со долг дострел

Добивај вести на Viber

Украинскиот претседател Володимир Зеленски вели дека неговиот руски колега, Владимир Путин не е луд, туку е опасен. 

Зеленски изјави за Гардијан дека руските власти му се смеат на Киев поради одложувањето на дозволата од САД за употреба на западно оружје за гаѓање цели во Русија.

Зеленски рече дека американската претпазливост се плаќа во човечките животи и го повика американскиот претседател Џо Бајден да ја надмине загриженоста за можна нуклеарна ескалација со Москва.

По повеќемесечно лобирање, САД синоќа за првпат ѝ дозволија на Украина да користи одредени оружја од американско производство во Русија за да го брани Харков. Но, во интервју за Гардијан, Зеленски јасно стави до знаење дека за време на нападите на руска територија, тој мора да има способност да користи моќно оружје со долг дострел - што е „црвена линија“ што САД сè уште немаат намера да ја преминат.

„САД треба повеќе да веруваат во нас. Без зелено светло од САД, другите сојузници, како што е Велика Британија, веројатно нема да дозволат Украина да го користи нивното оружје со долг дострел. Верувајте ни, ние мора да одговориме. Русите не разбираат ништо друго освен сила, ние не сме нивната прва, ниту последна цел. Мислам дека е апсолутно нелогично што имаме западно оружје во наши раце, а потоа само гледаме како убијците и терористите нѐ уништуваат. Мислам дека се смеат на оваа ситуација. Тоа е како да ловат, ловат луѓе. Тие знаат дека можеме да ги видиме нив, но не можеме да дојдеме до нив“, додаде тој.

Зеленски во интервјуто рече и дека новото американско оружје се уште не пристигнало во доволни количини до бригадите на североистокот на Украина, каде што напредува Русија. Некои земји дозволуваат, а некои не, Украина да го користи нивното оружје за напади на руска територија. Војната во Украина почна на 24 февруари 2022 година.