Зошто штрајкуваат пилотите на „Луфтханза“?

Добивај вести на Viber

Пилотите на „Луфтханза“ годишно земаат просечна плата од 180 илјади евра и се меѓу најдобро платените професионалци во Германија, а сепак одлучија во периодот пред Велигденските празници да започнат еден од најмасовните штрајкови во историјата на компанијата и да го предизвикаат незадоволството на патниците. Причина за ваквиот чекор е незадоволството од условите за пензионирање. Еден од пилотите, 34-годишниот Маркус Вал, објаснил дека штрајкува затоа што сака да е добро финансиски обезбеден пред да замине во пензија. Според Вал, кој лета веќе 11 години по 80 часа месечно на релациите кон Њујорк и Сингапур, наместо да им дели дивиденди на акционерите, „Луфтханза“ мора да се погрижи за вработените. Преговорите меѓу синдикатот и раководството на компанијата околу условите за пензионирање траат веќе две години, но без успех, а ситуацијата дополнително се усложни кога „Луфтханза“ одлучи еднострано да ги укине таканаречените „преодни пензии“ за пилотите и останатиот екипаж, со кои се овозможуваше тие и предвреме да ја напуштат работата. Штрајкот ја погоди и нискобуџетската авиокомпанија на „Луфтханза“ - „Џерман Вингс“. Германскиот министер за транспорт Александер Добринт ги повика синдикалците и раководството на компанијата брзо да постигнат договор, во интерес на патниците кои се потпираат на услугите на овој авиопревозник. Но, многу поостар е претседателот на германскиот Одбор за надворешна трговија Антон Бернер, кој оценува дека е „неподносливо оние кои имаат врвна плата од околу 200 илјади евра, да бараат и можност за предвремени пензии, а како заложници да ги држат патниците и целата економија“. Вкупно 425 илјади патници ќе бидат погодени од тридневниот штрајк на пилотите, а повеќето од нив немаат разбирање и трпение за барањата на штрајкувачите. „Летот ми е откажан, а не можам да добијам никој ниту во сервисниот центар. Не знам што ќе биде, како да го пребукирам летот, кој ќе ги покрие хотелските трошоци за тоа време“, реагира еден патник. На германските аеродроми во транзит-зоната се пставени „полски“ кревети, но медиумите јавуваат дека особено би можеле да бидат погодени од штрајкот патниците кои немаат шенген-виза, бидејќи тие нема да можат да ги користат услугите на германската железница која во овој период им се стави на услуга на „заглавените“ патници.