ГЕРМАНИЈА ВЛОЖУВА МИЛИЈАРДИ ВО БУНКЕРИ - дали тоа се исплати, сѐ може да биде збришано со 9 до 12 ракети

Добивај вести на Viber

Можеби нема подобар начин да се процени степенот на стравот во една земја отколку да се погледнат компаниите што градат приватни бункери. На пример, BSSD Defense, компанија со седиште во Берлин која гради „системи за заштитени простории“ за приватна, деловна и воена употреба, во последно време добро и оди овој бизнис.

Покрај разновидна опрема за домашна безбедност, компанијата нуди сè, од „соби за привремена изолација и заштита“ за околу 20.000 евра до вистински засолништа за речиси 200.000 евра. Техничкиот директор на БССД Марио Пиејде вели дека во последните години имаат зголемен број на јавувања од приватни лица, противпожарни служби и локални власти.

Интересот почна да расте за време на пандемијата на Ковид, а потоа повторно се зголеми во 2022 година кога Русија ја нападна Украина, пишува Дојче веле (DW).

„Има активна побарувачка и активен интерес бидејќи нема толку многу компании кои се занимаваат со тоа. Никој не можеше да очекува дека повторно ќе се води конвенционална војна во Европа, но, за жал, историјата се повторува. Луѓето кои претходно размислуваа за тоа, сега почнаа да ги спроведуваат своите планови“, изјави Пиејде за ДВ.

Во Германија нема функционални засолништа

Се чини дека е така и во политичките кругови: на почетокот на јуни на конференцијата на министрите за внатрешни работи во Потсдам, Федералното Министерство за внатрешни работи им претстави на своите провинциски колеги „извештај за состојбата на развојот на концептот на модерното засолниште“ за германското население.

Извештајот дојде три месеци откако германската асоцијација на градови и општини, која претставува 14.000 локални власти, ја повика федералната влада да инвестира 10 милијарди евра во цивилна заштита во следните десет години и да ја искористи за опремување на 2.000 бункери од времето на Студената војна.

На Германија ќе и требаат повеќе од 200 илјади бункери

Ова не е мал потфат. Федералната канцеларија за цивилна заштита и помош при катастрофи (ББК) за ДВ вели дека само 579 од овие бункери сè уште се означени како јавно засолниште и имаат место за околу 478.000 луѓе (или 0,56 отсто од населението во Германија). Дури и овие бункери не се „функционални или подготвени за употреба“ откако претходниот систем на засолништа беше напуштен во 2007 година.

Новиот концепт на бункер е во фаза на планирање, вели ББК, но во извештајот на федералната влада, кој беше објавен до различни германски медиуми, се вели дека за да се заштити целото население, ќе биде неопходно да се изградат уште околу 210.100 бункери, за што би биле потребни 25 години и чинеше 140,2 милијарди евра.

„Изградбата на заштита на населението секако е запоставена во последните 35 години“, рече Пједе, но заживувањето на таквите засолништа треба да биде изводливо. „Не се промени многу во градежништвото во последните 50 години. Постои одредена јачина на ѕидот, дебелина на ѕидот, системи за филтрирање. Сè што се промени е напојувањето и ефикасноста на батеријата“, додаде тој.

Во секој случај, колку користи бункер?

Ханс-Волтер Борис, директор на Институтот за економски и безбедносни студии ФИРМИТАС на Универзитетот во Витен, се согласува дека прашањето за заштита на населението е главно запоставено, пренесува ДВ.

Но, тој се прашува колку всушност би биле корисни бункерите во однос на воената моќ во војната меѓу НАТО и Русија (ако навистина се подготвува сценариото за тоа). На пример, Русија има хиперсонични ракети кои можат да стигнат практично до секој европски град за две до пет минути од Калининград.

„Не е како во Втората светска војна, кога предупредувањата од бомбардери кои летаа над Хановер кон Берлин им даваа на луѓето 15 или 20 минути да најдат засолниште. Со сегашните времиња на реакција, нема начин да се предупреди населението“, изјави за ДВ Борис, кој е и резервен полковник на Бундесверот.

Германската влада е свесна за овој проблем. Во случај на војна, се вели во владиниот извештај, големите централни бункери би биле многу помалку корисни од децентрализираните заштитени простори во станбените згради. Затоа Владата планира да им препорача на граѓаните да набават евтини и лесно достапни градежни материјали за да изградат безбедни простории во нивните подруми.

Борис не е убеден во концептот, особено ако се земе предвид дека таков конфликт може брзо да ескалира во нуклеарна војна, а нуклеарното оружје сега е неизмерно поуништливо од оние што ги користеа САД на крајот на Втората светска војна.

„Последиците веќе не се споредливи со Хирошима или Нагасаки. „Со модерно оружје, цела Германија може да биде збришана со девет до дванаесет ракети“, рече тој. Бункерите кои би можеле да издржат таков напад би требало да бидат закопани илјадници метри длабоко во швајцарските Алпи.

А после тоа воопшто не би сакале да излегувате“, рекол овој експерт.

Парите подобро се вложуваат во „нормална“ заштита

Наместо да инвестираат милијарди во изградба на мрежа од бункери во случај на војна, Борис тврди дека владите би било подобро да инвестираат во она што тој го нарече „нормална“ заштита на населението. Ова, рече тој, може да биде систем за предупредување за катастрофи, особено природни како поплави, и создавање подобра обука за организациите за помош при катастрофи.

„Ова значи пари за тренинзи, вежби, современа опрема. Сето тоа би имало повеќе смисла отколку да ги замислувате овие сценарија за нуклеарна војна кога и онака не можете да направите ништо“, заклучи Борис.