Поканата за НАТО денес ќе му биде врачена на премиерот Заев
Објавено во: Македонија 12 Јули, 2018
Официјалната покана со која Македонија треба да почне преговори за членство денеска генералниот секретар Јенс Столтенберг ќе му ја врачи на премиерот Зоран Заев на свечена церемонија во седиштето на најголемиот воено-политички сојуз во светот.
Лидерите на 29-те земји членки на НАТО вчера на првиот ден на Самитот во Брисел одлучија да ја поканат Македонија со што се отвора патот Македонија да стане 30. членка на НАТО.
Од поканата до конечното членство следуваат процеси, како во однос на исполнување на обврските што Скопје и Атина ги презедоа во Договорот за решавање на спорот за името, така и во однос на процедурите кои престојат за секоја земја-аспирантка.