ПРАТЕНИЧКА ОД ВМРО-ДПМНЕ ЈА НАРЕЧЕ „ФЕЈСБУК ПРАВЕН ЕКСПЕРТ НА БАТЕРИИ“: Ана Павловска-Данева го помина комисискиот филтер за уставна судијка

Добивај вести на Viber

Универзитетската професорка Ана Павловска-Данева го помина комисискиот филтер за уставна судијка. 

Со седум гласа „за“, три „против“ и ниту „воздржан“ собраниската Комисија за прашањата на изборите и именувањата денеска го утврди предлогот на владејачкиот СДСМ, Павловска-Данева да биде кандидат за судија во Уставниот суд. Пратениците на ВМРО-ДПМНЕ во матичната собраниска комисија повторно кажаа дека предлогот на Павловска-Данева за уставен судија е партиски, а од СДСМ ги отфрлија тврдењата и повикаа да се комплетира составот на Уставниот суд. 

Пратеничката Марија Петрушевска од ВМРО-ДПМНЕ во текот на расправата го оспори предлогот за Павловска-Данева да биде номинирана за кандидат за уставен судија. Додаде дека таа е поранешна партиска потпретседателка на партијата која ја предлага – СДСМ.

Таа ја нарече Павловска-Данева „Фејсбук правен експерт на батерии“ и учесник кој требало да се огради од „Шарената револуција“ затоа што не се извинила од штетните политики на СДСМ.

Пратеничката од СДСМ, Снежана Калевска-Ванчева изјави дека немало конструктивна критика во говорот на Петрушевска и додаде дека правните експерти што ја оцениле лошо Дамева се всушност, „на батерии“.

На 24 јануари по скоро година и половина расправа во Собранието е повлечен предлогот за доскорешниот републички обвинител Љубомир Јовески да биде уставен судија.

Павловска-Данева е редовен професор на научната област Административно право и јавна администрација на Правниот факултет „Јустинијан Први“ при Универзитетот „Св. Кирил и Методиј“ во Скопје. Родена е на 22.02.1973 година во Скопје. Во 2004 година, се стекнала со научен степен доктор на правни науки, со одбрана на докторската дисертација на тема „Управни договори“ и е избрана за доцент на научната област управно право на Правниот факултет „Јустинијан Први“, по што напредува во звањата и станува вонреден професор (2009 година) и редовен професор (2013 година).