ПРИВРЕМЕНИОТ ЗАТВОР НА ПАЛЕВСКИ НАСКОРО ИСТЕКУВА: Што очекува Бубевски во однос на екстрадицијата?

Добивај вести на Viber

За една недела му истекува привремениот затвор на првоосомничениот за двојното убиство на Панче и Вања, Љупчо Палевски во Турција. 

Шефот на скопското обвинителство, Гаврил Бубевски, на денешниот брифинг со новинарите рече дека во случајот со убиството на Вања и Панче нема нови осомничени лица и не гледа пречка постапката за екстрадиција од Турција на првообвинетиот Љупчо Палевски Палчо да заврши брзо.

На 6-7-ми февруари, истекува привремениот затвор што турските власти му го одредија на Палевски на 29-ти декември, осомничен за убиството на 14-годишната Вања Ѓорчевска и 74-годишниот Панче Жежовски. Палевски моментално се наоѓа во затвор во Баликесир, Турција, каде може да биде задржан до една година. Се очекува по истекот на мерката од 40 дена да му биде продолжен привремениот затвор или притворот, затоа што македонските власти сè уште немаат добиено одговор од Турција за барањето за екстрадиција, кое беше испратено на 7-ми декември. Од Министерството за правда за „Фокус“ велат дека очекуваат одговор од Турција во следните неколку дена, по што ќе ја информираат јавноста.

По него беше распишана меѓународна потерница како осомничен за две кривични дела,  грабнување и две убиства на свиреп начин. Штом ќе го екстрадираат, Палевски ќе биде пречекан во земјава со судско решение за притвор од 30 дена и ќе биде префрлен во истражниот затвор во Шутка. Таму веќе се тројцата осомничени соизвршители. 

Во врска со партијата Десна, која продолжи со работа, каде дел од осомничените се членови, Бубевски додаде дека нема докази дека партиски влијанија имале некаква врска со дејствијата во случајот.

Малолетната Вања и Панче, кои беа пријавени за исчезнати на 27 и 24 ноември беа пронајдени мртви во близина на Велес и Скопје на 3 декември.