Странска фирма за три години од само двајца вработени стигна до кредит од 13 милиони евра
Објавено во: Економија 20 Ноември, 2018
Иако најави помала, грчкиот инвеститор „Секе“, сопственик на фабрика за преработка, откуп и трговија со тутун во Крушево, реши да ја прошири инвестицијата, од неколкумина да вработи 350 луѓе. За фабриката и во Макеоднија се креваше прашина, затоа што ја поврзуваа со руски бизнисмени, сепак компанијата одлучило да расте. За новите вложување заложен е имот и за нов кредит, вреден речиси 13 милиони евра, кој ќе бид еповлекуван по потреба.
Грчката компанија „Секе“ во април 2016 година со локалните власти во Крушево потпиша договорот за земјиште во индустриската зона „Опаленик“, а е регистрирана уште од 2013 во Македонија. Првичната амбиција на компанијата беше дека ќе вложи четири милиони евра и во новите погони ќе вработи меѓу 250 до 300 работници. Неколку месеци подоцна, при посетата на Крушево, тогашниот премиер Никола Груевски, рече дека инвестицијата на „Секе“ ќе биде над три милиони евра и дека фирмата постојано ќе ангажира 30 работници, додека сезонски таа бројка ќе се движи меѓу 250 и 300 лица.
Официјалните податоци од крајот на 2015 година покажуваат дека компанијата имала само двајца вработени и материјални средства во износ од близу 72.000 евра, за во 2016 година оваа бројка да се зголеми на над 440 илјади евра. Најавувано беше дека ќе започне со откупување на ориентален и крупнолисен тутун и дека ќе склучи договори со 1.500 кооперанти. Директорот Александрос Контос е поранешен пратеник и министер за земјоделство во Владата на Неа Демократија на Костас Караманлис во периодот од 2007 до 2009 година.
Неодамна фирмата ја посети и премиерот Зоран Заев. Претседателот на бордот на директори на фабриката СЕКЕ, Панајотис Таренидис, го информира премиерот дека засега во фабриката се вработени 55 луѓе, но дека таа бројка за неколку месеци ќе се зголеми на 350. Половина од инвестицијата за изградба на објектот е од сопствен капитал на компанијата.
A.K.