(ВИДЕО-ФОТО) НАЈГОЛЕМИОТ ПРОТЕСТ ВО РОМАНИЈА: Тепачки, крв и солзавец на сите страни

Добивај вести на Viber

Најмалку петмина повредени и 60 приведени е билансот од судирите на демонстранците и припадниците на безбедносните сили во текот на протестите во Букурешт и другите романски градови-најмасовни од падот на комунизмот од 1989 година.

Според медиумите, најмалку 200 000 луѓе излегле на улиците ширум земјата од кои половина во Букурешт, протестирајќи против одлуката на социјалдемократската влада да ги попушти прописите за сузбивање на корупција. Во отсуство на официјални соопштенија, поедини медиуми бројот на демонстранти во цела Романија го проценија на 300 000 во цела Романија.

Во главниот град, протестот е завршен со судир на силите на редот и последните групи демонстранти пред седиштето на владата, на плоштадот Викторија. Кога повеќето демонстранти се разотишле, полицијата се соочила со петарди, камења и шишиња, на што возвратила со солзавец. Според официјалните податоци полесно се повредени двајца полицајци и двајца демонстранти.

Демонстрантите го осудиле изненадното усвојување во вторникот вечерта на итната уредба која би можела да ги ослободи политичарите од некои обвиненија. Бунтот против тоа трае и се зголемува веќе десет дена. Новата влада е во напната кохабитација со претседателот на Романија, десничарот Клаус Јоханис, кој владината уредба за ублажување на прописите за борба против корупцијата ја оценил како „неприфатлива“ и „скандалозна“ и рекол дека очекува Уставниот суд да не ја прифати.

Уредбата декриминализира повеќе дела и злоупотреба на власта, а некои од тие дела стануваат казниви со затвор само ако е предизвикана штета од 44 000 евра. Тоа посебно треба да му овозможи на шефот на Социјалдемократкста партија Ливио Драгне да избегне судење поради фиктивни работи кои формално ги почнал во вторникот. Драгне го сакал местото на премиерот, но морал да поднесе оставка поради казната од две години затвор условно, поради изборни измами.