ЛОГА ЗА РАСКОЛОТ ВО ПАРТИЈАТА: И да ни се разделат патиштата, ова да го направиме како цивилизирани и семејни луѓе

Добивај вести на Viber

Министерот за правда, Кренар Лога го искоментира расколот во Алијансата за Албанците. 

За 24 часа во партијата се случија два инциденти кои следеа по отворениот раздор меѓу актуелниот и поранешниот претседател на АА, Арбен Таравари и Зијадин Села околу настапот на партијата на следните избори.

„И да ни се разделат патиштата, ова да го направиме како цивилизирани и семејни луѓе“, апелираше генералниот секретар на Алијанса за Албанците (АА) и министер за правда, Кренар Лога. 

Тој повика на самоконтрола и смиреност кај членството додека, како што рече, сите во партијата се обидуваат да го изнајдат правиот и вистинскиот пат.

„Можеме да имаме недоразбирања и несогласувања, но воопшто не треба да се оддалечиле еден од друг од нашата заедничка куќа. Додека сите заедно се трудиме да го изнајдеме правиот и вистинскиот пат, повикуваме на самоконтрола и смиреност. Ние сме поминале многу настани заедно, како радосни така и тажни. Заради тоа апелираме и да ни се разделат нашите патишта, ова да го направиме како цивилизирани луѓе и семејни луѓе“, пишува Лога во објавата на Фејсбук.

Лога го осуди вчерашниот напад на членови на Алијанса за Албанците, меѓу кои и директорот на Агенцијата за управување со одземен имот, Дритон Небиу, како и денешниот инцидент кога пред куќата на партискиот лидер Таравари беше пронајден наиспукан куршум од калашников. Вели дека виновниците треба да бидат изведени пред лицето на правдата. 

Села го обвини Таравари за кршење на партискиот статут и најави негово разрешување.

Таравари е на чело на партијата од септември 2022 година. Во последниот негов пост објави дека ја добил поддршката од мнозинството пратеници на Алијанса, дека доброволно биле собрани 80 потписи на пратеници од вкупно 133 во партиското Собрание, а процесот на собирање потписи продолжува. Села кажа дека тоа не е партија на потписи.