Лукаревска кажа кои се следните потези: 258 фирми кои добиле помош не исплатиле плати
Објавено во: Економија 14 Февруари, 2021
Останаа уште 258 работодавачи кои добиле финансиска помош не исплатиле плати за месеците за кои имаше финансиска поддршка, објави директорката на Управата за јавни приходи, Сања Лукаревска.
„Од нив 226 фирми не исплатиле плата за еден месец, 26 за 2 месеци, а шест компании за три месеци. Кај тие кои направија злоупотреба за декември се оди со присилна наплата, рече денеска Лукаревска.
На 6 февруари Владата ја објави новата листа на претпријатија кои добиле државна помош но не ја исплатиле како плати за своите работници.
Станува збор за плати кои требаше да се исплатат за последниот месец од минатата година во рамки на петиот пакет на помош за стопанството за справување со кризата.
Тогаш Лукаревска, рече дека сметките на фирмите ќе се блокираат и со присилна наплата парите ќе им се префрлат на вработените.
Беше соопштено и дека се извршени контроли кај 60 фирми кои добиле субвенции од државата за плати лани во април, мај и јуни или октомври, ноември и декември, а не ја исплатиле платата на работниците. Контролите се направени по пријава на граѓани и врз основа на направена анализа на УЈП на фирми кои добиле помош, а не исплатиле плата. Таа денеска рече дека контролите вродиле со плод.