МЕТЕЖ НА ТАБАНОВЦЕ: Граѓаните побрзаа додека им важат старите документи да посетат роднини во Србија или да се прошетаат
Објавено во: Македонија 05 Февруари, 2024
Овој викенд имаше долги колони возила и се чекаше по еден час на граничниот премин Табановце. Граѓаните ја користат шансата да прошетаат во Србија или да посетат роднини додека сè уште им важат старите документи.
По 12 февруари, нема да можат да патуваат со документи на кои е впишано старото име на државата. Ова беше претпоследен викенд со можност да се помине границата со старите документи. Граѓаните патуваат со приватни возила, но и со автобуси.
„Јас вчера ја читав веста дека имало долги колони. И јас спаѓам во таа категорија на граѓани кои ќе ја искористат шансата да одат во Србија додека важат старите документи. Имам сестра во источна Србија. Ќе патувам во работен ден, се надевам дека гужвата ќе биде помала на граница, затоа што сум врзана да патувам со два различни автобуси и треба да стигнам навреме во Ниш. Ќе се вратам после три дена и потоа ќе се сликам за нови лични документи, но и ќе морам да чекам дури бидат готови, така што решив да одам и да се вратам пред 12-ти февруари. Претходно кога сум патувала немало поголеми гужви на граница, но ќе видам сега каква ќе биде состојбата“, вели Лидија С. од Куманово.
Од граничниот премин Пелинце ни одговорија дека имало нормална фреквенција како за викенд. Луѓето од Македонија го користат и овој премин за да отидат во блиските погранични места во соседна Србија.
„Се патува на релација Македонија - Србија. Имаме роднини во Белград, Пожаревац, Врање, Бујановац. Јас одам за Врање, Прешево, Бујановац. Соседите одат често во Србија. Ги користиме и двата гранични премина“, вели Тихомир Николиќ, претседател на месна заедница Старо Нагоричане.
Од автобуската станица во Куманово, велат дека викендов граѓаните купувале билети за патување до Белград и Ниш.
Како што соопшти полицијата, приближно 6.700 луѓе влегле и излегле на граничниот премин Табановце во саботата од полноќ до 13 часот.
Табановце е еден од најфреквентните премини. Во 2022 година најфреквентни биле граничните премини на северната граница со Косово и Србија со регистрирани од по четири милиони патници. Притоа, најголем дел од патниците го користеле граничниот премин Табановце, 4.767.272, стои во извештајот на МВР.
Сања Атанасовска