МИТРЕСКИ ЗА ВИП ТРЕТМАНОТ НА НОВИНАРИТЕ ОД КОСОВО И АЛБАНИЈА: Галеријата ја отворив за сите

Добивај вести на Viber

Претседателот на Собранието, Joван Митрески уверува дека на денот на изборот на техничката влада, собраниската галерија била еднакво достапна за сите новинари. 

Сепак, во дел од медиумските извештаи тој ден, како, на пример, на ТВ Телма, можеше да се слушне дека нивниот известувач седнал во редот веднаш зад гостите од Косовo и од Албанија, но собраниското обезбедување му кажало да се премести.

Митрески за 360 степени не сакаше да одговори директно дали му се допаѓала атмосферата што тој ден владееше во парламентот. 

„Јас не знам која била нивната улога, како што информиравме претходно, имаше и реакција од Здружението на новинари на Македонија и со допис од Кабинетот одговоривме на тоа. Сѐ што може да биде присутно во галеријата е новинари што имаат соодветни акредитации. Такви акредитации имаа сите присутни во галеријата на Собранието. Пред самиот почеток на седницата бев известен од службите дека има голема заинтересираност, прашав дали има најава за присуство на странски гости, претежно амбасадори коишто во некои случаи доаѓаат да следат седници. Прашав дали се присутни од кабинетот на претседателот, коишто исто така имаат свој простор во галеријата. Кога добив информации дека нема други гости, дадов налог да се отвори целосно галеријата за да се обезбеди присуство на сите новинари, уредници, камермани, за следење на седницата. Фактички, такви случаи сме имале претходно за седници кои будат голем интерес кај јавноста“, вели Митрески. 

Додаде дека и за други важни настани имало присуство на странски новинари.