ОСМАНИ: Се разгледува можноста државата да компензира за тие кои имаат важечки пасоши
Објавено во: Македонија 02 Февруари, 2024
Се разгледува можноста државата да компензира за тие кои имаат важечки пасоши, а заради договорот треба да ги сменат, вели министерот за надворешни работи, Бујар Османи.
Османи кажа дека од 12 февруари патните документи со старото име нема да важат. За граѓаните кои треба да се вратат во државата, а не ги смениле документите, тој напомена дека треба да бидат во комуникација со дипломатско конзуларните претставништва, преку кои ќе бидат упатени за понатамошна постапка. Тој нагласи дека се гледа и можноста за рефундација.
„Јас пред неколку дена бев искритикуван затоа што бев брутално искрен со граѓаните. Реков да не ги лажеме граѓаните бидејќи Преспанскиот договор не може да се смени. Лидерот на опозицијата велеше дека ќе достави претставка до Уставниот суд, за потоа да дојдат до тоа што јас го кажав дека треба да се реорганизираме за да им помогнеме на граѓаните. Ќе има дежурна екипа во Министерството која што ги прифаќа тие телефонски повици, нека се јават на тој број, ние ќе ги упатиме, ќе им укажеме што треба да направат“, рече вечерва Османи во своето гостување на ТВ21.
На прашање дели во моментот има такви повици, Османи посочи дека има, но очекуваат да се зголемат како се приближува рокот.