Со стар пасош назад во Македонија само со патен лист од конзулат
Објавено во: Македонија 01 Февруари, 2024
Македонските граѓани кои работат и живеат во странство со стар пасош по 12 февруари ќе можат да се вратат во земјата само со патен лист, издаден од конзулат во земјата, велат од Министерството за надворешни работи.
„Доколку државјани на Република Северна Македонија кои престојуваат во странска држава (по било кој основ) и кои до 12 февруари 2024 година немаат извадено нови патни исправи (пасоши), истите можат да се вратат во Република Северна Македонија со Патен Лист, издаден од најблиското дипломатско конзуларно претставништво на Северна Македонија. Потсетуваме дека нашите државјани имаат право да се сликаат во најблиското дипломатско конзуларно претставништво во странство во кои имаме воспоставено базна или мобилна станица, преку телефонско закажување или комуникација по е-маил (Претставништва со базни станици во: Минхен, Бон, Берлин, Берн, Виена, Љубљана, Лондон, Њујорк и Чикаго. Претставништва со мобилни станици во: Брисел, Стокхолм, Венеција, Торонто и Мелбурн)“, велат од МНР
Македонските државјани кои живеат во странство со месеци чекаат на издавање лични документи со новото име на државата. Иселениците чекаат со месеци за пасоши, бараат зајакнување на капацитетите во амбасадите на Република Молдавија
„Во моментов има бесплатни термини во септември 2024 година. Доколку времето на чекање ви одговара, ве молиме повторно дајте ни ги вашите лични податоци за да можеме да одредиме конкретен датум“, велат од Амбасадата во Бон, Германија.
Иселениците со овие патни исправи можат да дојдат во нашата земја, но за да се вратат во земјите каде што живеат треба да извадат нови патни исправи, за што кај нас се чека со месеци.
Проценките според Агенциите за вработување во странство се дека 24.000 македонски граѓани принудно ќе се вратат во земјата поради тоа што не им се обновени пасошите.