УШТЕ КОЛКУ ДЕЦА ТРЕБА ДА УМРАТ? Болниците во Македонија без основна опрема за спасување животи

Добивај вести на Viber

Извештајот за смртта на 14-месечното бебе ја потресе јавноста и ја отвори вратата кон длабоките и долгогодишни проблеми во македонскиот здравствен систем. Трагедијата не само што ја разниша довербата во здравствените установи, туку и ја извади на површина суровата реалност со која се соочуваат пациентите – недостиг на апаратура, лоши услови за третман, и несоодветно обучен кадар. Вознемиреноста која се шири меѓу граѓаните е оправдана, бидејќи овој случај е само еден од многуте во низата на пропусти и неуспеси кои секојдневно ги загрозуваат животите на најранливите. Оваа трагедија ги нагласи очајните состојби во кои здравствениот систем тоне со години, оставајќи ги и пациентите и медицинскиот персонал во безнадежност.

Последната трагедија ја целосно уништи и онака кревката доверба во здравството

„Незамисливо е токму Клиниката за белодробни заболувања кај децата „Козле“ да нема апарати за респираторна поддршка. Како можат да третираат деца со сериозни белодробни проблеми без основната опрема? Ова е катастрофално и не ги ризикува само животите на децата, туку ја уништува секоја доверба што ја имавме во здравствениот систем.“

„Ова е вистинско лудило! Како може во 21 век, во држава која тврди дека вложува во здравството, да нема основна медицинска опрема во клиниката што треба да им помага на најмладите пациенти? Ова е скандал!“

„Не знам што да кажам. Се прашувам дали ова воопшто е вистина. Децата се најранливиот дел од нашето општество, а ние ги оставаме без основна грижа. Ова е само показател колку сме потфрлиле како држава.“

Ова се само дел од коментарите на граѓаните ја одразуваат длабоката вознемиреност и револтот што го предизвика последниот во низата слични случаи во Македонија, но болнички извори за Фактор, брифираат дека во јавните здравствени институции немаат ниту основни материјали, а не пак софистицирана медицинска опрема.

„Не е само прашање на софистицирана медицинска опрема, ние немаме дури ни основни материјали за секојдневната работа. Во многу клиники нема шпатули за преглед на грлото – медицинските сестри и докторите импровизираат со стари и неквалитетни инструменти. Од ракавици и стерилни материјали постојано има недостиг. Носиме стари мантили кои се истрошени од толку години употреба, што повеќе не нудат ни минимална заштита. Ова не е само хигиенски проблем, туку и директно влијае на безбедноста на пациентите. Некои болници немаат дури ни сапун за раце или дезинфекциски средства, што е апсурдно во постпандемискиот период кога знаеме колку е важна хигиената.

А, да не зборуваме и за тоа дека многу од апаратите се толку застарени што не можат ни да се користат, или пак мораме постојано да ги испраќаме на сервис, а на крај, сè уште остануваат нефункционални. Ова не е само проблем со опремата, туку и со безбедноста и квалитетот на третманот што можеме да го понудиме на пациентите. Болничкиот систем се распаѓа пред нашите очи, а ние се обидуваме да ги спасуваме животите на пациентите со ресурси од минатиот век.“

И последниот ревизорски извештај открива критични пропусти во здравствените установи за 2024 година

Здравствениот систем во Македонија е соочен со длабоки и долготрајни предизвици кои значително го влошуваат квалитетот на грижата за пациентите. Еден од најзначајните извори на овие проблеми се јавните здравствени установи, каде што хроничниот недостаток на медицинска опрема и несоодветното користење на средствата го загрозуваат здравјето и безбедноста на пациентите. Најновите податоци од Државниот завод за ревизија ги откриваат критичните слабости на болниците, почнувајќи од недоволната опременост до сериозни неправилности во управувањето со ресурсите. Спроведената ревизија ја опфаќа финансиската усогласеност и управувањето со средствата во болниците, а резултатите покажуваат критична состојба. Во некои болници, клучна опрема како апарати за респираторна поддршка е нефункционална или недостапна, што значително го влошува квалитетот на здравствената грижа. Дополнително, ревизијата истакнува недостатоци во хигиенските стандарди и неусогласеност во планирањето на здравствените услуги, што доведува до пренатрупаност и долги листи на чекање. Главните проблеми вклучуваат:

Недостиг на медицинска опрема: Во болниците постојат недостатоци во важни медицински апарати, што сериозно влијае на квалитетот на здравствената грижа. На пример, во некои болници недостасуваат апарати за респираторна поддршка и соодветна опрема за третман на тешки случаи.​

Ова води до ситуација каде што пациентите мора да се префрлуваат помеѓу здравствени установи за да добијат неопходниот третман.

Неправилности при набавките и користењето на опремата: Според ревизиите, во болниците не се вршат соодветни контроли при набавката и користењето на опремата, што води до ризик од неефикасно користење на средствата. На пример, некои уреди, како линеарни акцелератори, се со години нефункционални поради недостаток на сервис и одржување, што ја ограничува употребата на важни технологии за третман на онколошки заболувања​

Недостаток на хигиенски услови и процедурални стандарди: Освен недостигот на опрема, постојат и недостатоци во спроведувањето на основните хигиенски и медицински стандарди, што дополнително го влошува квалитетот на здравствените услуги​

Недостапност на термини и услуги: Многу здравствени установи не успеваат да обезбедат доволно термини за пациентите преку системот "Мој термин," со што само околу 39 отсто од услугите се достапни на пациентите. Ова создава долги листи на чекање и недоволна здравствена заштита, особено за пациентите од руралните подрачја.​

Анита Буховски