Добивај вести на Viber
Лидерот на СДСМ, Венко Филипче, соопшти дека е категорично против прераснувањето на Здружението на албански академци во паралелна Академија на науки и уметности, финансирана од општините Чаир, Тетово, Гостивар и Желино.
„Загрижен сум и категорично се спротивставувам на идејата за формирање на паралелна нова Академија за науки и уметности. Преседан е создавање на "етнички чисти" институции, а оваа иста идеја недвосмислено беше и претходно отфрлена од актуелните академици“, истакна претседателот на опозициската партија.
Тој нагласи дека го дели истиот став со својата партија. Во име на СДСМ го повикува ВМРО-ДПМНЕ да не молчи за овој случај кој го организира нивниот коалиционен партнер Влен.
„СДСМ нема да поддржи никаков паралелизам во институциите. Науката не смее да се етнизира на ниеден начин и во ниеден случај. За СДСМ и за мене како претседател ова е тенденциозна политичка порака која им служи единствено на намерите за поттикнување на поделби кои носат огромна штета за граѓаните и општеството.
Жалам што оваа идеја ВМРО-ДПМНЕ ја одмолчува, а со тоа и ја одобрува. СДСМ со сите расположливи механизми ќе се спротистави во општините кои треба да го финансираат овој проект“, додава Филипче.