ВРАТЕНИ МУ СЕ ПАСОШОТ И ЛИЧНАТА КАРТА: Ѓорѓе Давид еднаш месечно ќе се јавува во судот во Куманово

Добивај вести на Viber

Српскиот пејач Ѓорѓе Давид еднаш месечно ќе се јавува во судот во Куманово. 

Српскиот државјанин кој учествуваше во сообраќајната несреќа во близина на граничниот премин Табановце ќе се јавува еднаш во месецот во Основен суд Куманово, соопштија за МИА од судот. Нему му се вратени пасошот и личната карта.

Тој треба да се јавува секој 15-ти во месецот. Доколку 15 е неработен треба да се јави наредниот работен ден.

Против ваквото решение немаше жалба од ОЈО Куманово и решението е правосилно на ден 30.01.2024 година (вторник), патната исправа и личната карта му беа вратени на српскиот државјанин, велат од кумановскиот Суд. 

„Судија на претходна постапка при Основен суд Куманово, постапувајќи по предлог на бранител на осомничениот Ѓ. Н. од Република Србија за замена на мерка на обезбедување на присуство – мерка на претпазливост на ден 26 јануари, годинава донесе решение со кое делумно го уважи барањето на бранителот на осомничениот, ги укина мерките претпазливост привремено, одземање на лична карта за преминување на државна граница, како и патна исправа“, соопшти Судот.

Претходно СВР Куманово информираше дека во сообраќајната несреќа што се случи на 20 јануари на автопатот Куманово-Табановце на два километри пред граничниот премин, околу 20:00 часот, учествувале три автомобили, од кои едниот со српски национални ознаки.

Во сообраќајката учествувале патничко возило „фолксваген поло“ со кумановски регистарски ознаки, управувано од Б.Т.(24) од Куманово, патничко возило „фолксваген голф“ со скопски регистарски ознаки, управувано од В.П.(45) од Куманово и патничко возило „опел инсигниа“ со српски национални ознаки, управувано од Ѓ.Н.(59) од Република Србија. Во несреќата, од здобиените повреди починала Љ.Т.(49) од Куманово, сопатничка во возилото „поло“. 

Со тешки телесни повреди се здобиле В.П. и Б. Т, а со телесни повреди се здобил Ѓ.Н., констатирани во болницата во Куманово.

Од Обвинителството тогаш извршија увид и според нивните првични сознанија, прво настанал судир меѓу автомобилите со македонски национални ознаки, бидејќи едно од возилата влегло на автопат во недозволена насока. Откако жената излегла од автомобилот на неа налетало возилото со српски ознаки. Од здобиените повреди, кумановката починала. Обвинителството тогаш издаде наредба за обдукција на починатата и за испитување на примероци од крв и урина на другите учесници кои беа хоспитализирани со полесни повреди. Прибрани биле и траги и материјални докази кои ќе се вештачат.

Пејачот деновиве преку социјалните мрежи соопшти дека со пласирање невистини, медиумите му го направиле животот пекол.